Un suculento retrato da nécora

Presentar este ensaio de José de Cora sobre a nécora é unha gran satisfacción.

Unha satisfacción, por unha banda, non merecida e un chisco ousada para min dada a inconmensurable achega que fai ao coñecemento da nécora neste libro lixeiro de cargas na súa paxinación, consistente no seu contido, multidisciplinar e moi documentado, con tantos vectores de coñecemento como patas ten este crustáceo que representa con lucimento organoléptico a mellor gastronomía do mar.

E, por outra banda, quero adiantar aos lectores que este libro marca o comezo dunha nova colección a Academia denominada «Andar, Ver e Catar».

Este grande ensaio sobre a nécora, que o autor, na súa modestia, denomina retrato, é o máis completo que coñezo dedicado biolóxica e gastronomicamente ao magnífico crustáceo.

Neste ensaio, o autor agasállanos co seu talento, a súa sabedoría e mais o seu gusto polo bo comer, algo que nos une coma a vianda e o sal nesta gran mesa da gastronomía que é a Academia.