O ladrón de reliquias

Tras descubrirse o roubo das reliquias do Apóstolo na cripta da catedral compostelá, a Igrexa acorda comezar as investigacións en segredo.

Don Adolfino, bispo auxiliar de monseñor Patiño e o seu secretario don Liberto, póñense ao fronte da operación e contratan os servicios do catedrático Cosme Durán. Cosme é un profundo coñecedor do sartego e autor de varios traballos sobre as reliquias. El mesmo foi obxecto do roubo da documentación que facilitará aos ladrón o espolio catedralicio.

As pescudas de Cosme comezan en Astorga. A súa catedral foi víctima dun latrocinio semellante, pero os seus movementos son seguidos casualmente por Chenoa, unha xornalista que a partir de entón colaborará con el na resolución do caso; por Pascual, ao servicio dun enigmático Priorado do Limón; e polo inspector García.

En Astorga entra en contacto con don Honorio, un delincuente que lle ofrece facerse coas reliquias de Prisciliano, pero que non parece estar implicado no caso de Compostela. Na realidade o cerebro da operación é o intermediario portugués don Duarte, que negociou co Priorado o roubo e posterior traslado das reliquias a Braga. Nesa cidade planearon o latrocinio como vinganza polo espolio de reliquias que Diego Xelmírez levou a cabo en varias igrexas bracarenses durante o século XII.

Cosme rouba a don Honorio o cranio de Prisciliano e regresa a Santiago onde o Priorado se dispón a celebrar capítulo xeral, antes de trasladar o botín a Portugal.

Gracias a un vídeo que Chenoa e a súa amiga Cris gravan a noite de autos, Cosme e as súas colaboradoras logran infiltrarse na xuntanza do Priorado, propiciando a detención de todos os seus membros acusados de conspirar.

O roubo aínda segue a ser un segredo. Liberto, Cosme, Chenoa e Cris localizan o coche que traslada as reliquias cara a Portugal; e ao través dunha hábil estrataxema, recuperan a arca e entrégana ás autoridades eclesiásticas na compaña do cranio de Prisciliano, cobrando por isto dous millóns de euros.

Despois de cobrar a recompensa prometida, don Honorio esíxelles o pago polas reliquias de Prisiciliano. Cosme e Chenoa entregan os cartos gañados na operación. Quedan sen o diñeiro, pero atopan o amor.
Unha última sorpresa agardará aos protagonistas e a propia catedral de Santiago.